Seoladh an clár CERV in 2021 ar feadh tréimhse seacht mbliana, agus tá buiséad os cionn EUR 1.5 billiún aige. Is iad na príomhghrúpaí atá incháilithe le haghaidh cistiúcháin ná eagraíochtaí de chuid na sochaí sibhialta atá gníomhach ar an leibhéal áitiúil, réigiúnach, náisiúnta agus trasnáisiúnta. Chomh maith leo sin, áirítear líonraí Eorpacha, údaráis phoiblí (lena n-áirítear comhlachtaí comhionannais agus comhlachtaí atá dírithe ar chearta an duine), údaráis náisiúnta, réigiúnacha agus áitiúla, bailte agus bardais, an lucht acadúil/institiúidí taighde, meithleacha machnaimh, na breithiúna, eagraíochtaí idirnáisiúnta agus geallsealbhóirí eile atá gníomhach maidir le luachanna agus cearta an Aontais a chur chun cinn.
Áirítear leis na tionscadail a ndéantar cistiú orthu oiliúint, forbairt acmhainní agus malartuithe dea-chleachtais idir údaráis agus comhlachtaí thíortha an Aontais, nascadh bailte, tacú le heagraíochtaí pobail agus leis an tsochaí shibhialta, feasacht daoine a mhúscailt faoina gcearta agus faoi na tairbhí a ghabhann le beartais an Aontais dá saol laethúil, agus tacú le forbairt beartas agus reachtaíochta eolasbhunaithe de chuid an Aontais trí shuirbhéanna, staidéir agus anailísí. Tacaíonn an clár freisin le forbairt acmhainne príomhlíonraí ar leibhéal an Aontais (go háirithe EQUINET, líonra comhlachtaí comhionannais an Aontais).
